Филипче: Прашање на време е кога целата коалиција ќе се распадне, очигледно ништо суштински не ги врзува политичките партии
Претседателот на СДСМ Венко Филипче за случувањата во владината коалиција по превирањето од Алијанса за Албанците предводена од Арбен Таравари вели прашање на време е кога целата коалиција ќе се распадне, очигледно ништо суштински не ги врзува политичките партии во таа коалиција.
Во одговор на новинарски прашања по отворање градинка на територија на Општина Центар, Филипче рече дека „тоа што во последно време се случува во владејачката коалиција укажува дека единствена работа којашто ги води партиите во таа коалиција се нивни теснопартиски и финансиски интереси“.
-Така што, таква коалиција којашто не се темели на никакви вредности и нема никаква идеја и визија како да ја води државата напред, а за тоа сведочиме секој ден, осудена е само на една работа, а тоа е неуспех, изјави Филипче.
Во врска со евентуално излегување на Арбен Таравари од Владата и дали СДСМ би соработувал со неговата Алијанса за Албанците, Филипче одговори дека тоа ќе се види од развојот на случувањата.
-Не знаеме како Арбен Таравари ќе се однесува понатаму, дали ќе прави некакви коалиции или не, да почекаме и да видиме. Како ќе се одвиваат работите, тоа не е наша работа. Ние во СДСМ се спремаме за претстојните избори и нашите врати се отворени и канали на комуникација, бараме партнери. Ја потврдивме нашата коалиција од 14 партии, заеднички веќе почнавме да ги креираме листите за сите општини, а во однос на други партнери почнува процесот на разговори, рече лидерот на СДСМ.
Додаде дека неговата партија е „апсолутно спремна за каков и да е изборен циклус во претстојниот период“, доколку има и предвремени парламентарни избори.
Филипче не откри конкретни имиња на кандидати за градоначалници затоа што, рече, смета дека „не е фер тоа да го прави додека траат внатрепартиските процедури“.
– Нека завршат, во некои општини навистина брзо се одвиваат и верувам дека многу скоро ќе ги знаеме кандидатите за градоначалници, барем за дел од општините, изјави Филипче.
На прашање дали за изборите СДСМ би коалицирала со ДУИ, одговори дека ќе разговараат со сите политички партии, меѓутоа, рече, „принципите на коалиција значат дека коалициските партнери прво треба да се почитуваат, да се целосно согласни околу програмите кои ќе им ги ветиме на граѓаните“.
