Две ретки птици мршојадци пронајдени угинати во Кавадаречко
Надлежните служби спроведуваат постапка за утврдување на причините поради кои две ретки птици од видот мршојадец биле пронајдени угинати во Кавадаречко.
Од Секторот за внатрешни работи – Велес информираат дека случајот бил пријавен вчера во 11:25 часот во ОВР Кавадарци од страна на претставник на Македонското еколошко друштво. Птиците биле пронајдени во атарот на село Гарниково и станува збор за заштитен и редок вид.
На местото бил извршен увид од увидна екипа на ОВР Кавадарци, во соработка со инспектор за животна средина и претставник од Агенцијата за храна и ветеринарство, во присуство на претставници од Македонското еколошко друштво.
Угнатите птици се подигнати и пренесени на обдукција на Факултетот за ветеринарна медицина во Скопје, каде треба да се утврдат причините за смртта.
Од надлежните институции најавуваат дека по добивањето на резултатите ќе бидат преземени соодветни понатамошни мерки.
