Достоинство излегува од коалиција со СДСМ, една од причините е необештетување на воените инвалиди и семејствата на загинатите бранители!
Претседателот на Достоинство, Стојанче Ангелов информираше дека партијата излегува од коалицијата предводена од СДСМ.
„Поради неисполнети очекувања за надминување на горливиот проблем со кој сѐ уште се соочуваат необесштетените десетина воени инвалиди и петнаесетина семејства на загинати бранители, во согласност со моите јавни укажувања и барања од мај, минатата година, повторени во многу мои јавни настапи во периодот потоа, „Достоинство“ излегува од коалицијата предводена од СДСМ“, рече Ангелов.
Според него, иницијативите на партијата, поднесени до Владата и Собранието, нуделе решение за овој проблем, и иако добивале поддршка од екс премиерот Димитар Ковачевски и министерката за одбрана Славјанка Петровска, истите не поминале поради противењето на ДУИ.
Ангелов информираше дека и предложил оставка од позицијата директор на Центарот за управување со кризи до Ковачевски и генералниот секретар на СДСМ, Миле Зечевиќ Вардарски, но од нивна страна не било прифатено, со што тој останува да го води Центарот до формирање на следна Влада.
Лидерот на Достоинство вели дека проблемот со необештетените воени инвалиди и семејства на загинатите бранители не е единствена причина за излез од коалиција, и додаде дека раководството минатата недела донело одлука да коалицира со ВМРО-ДПМНЕ.
„Во разговорите со ВМРО – ДПМНЕ пратеничко место ниту баравме, ниту ни беше понудено. Нашиот фокус како репрезент на македонските бранители од 2001 година не е освојување на пратеничко место, туку барање на решенија за проблемите на припадниците на безбедносните сили, учесници во одбраната на Македонија во 2001 година како и борба за нивните права,“ рече тој.
На новинарско прашање дали имаат некои ветувања од ВМРО -ДПМНЕ во однос на исполнување на барањата за бранителите, Ангелов посочи дека еден дел сигурно ќе помине, затоа што ВМРО–ДПМНЕ пружиле поддршка на иницијативата со Предлог- закон од Достоинство.
„Пред околу осум месеци ВМРО – ДПМНЕ самите поднесоа Предлог-закон кој што содржеше решение за овој проблем и понуди некои симболични, но, сепак, права за сите македонски бранители. Тоа ми дава надеж дека она што го предложија, доколу формираат влада, ќе успеат да го поминат во Парламентот“, рече Ангелов.
