Алиша: Бараме место во Уставот – нашите права не смеат да зависат од нечија добра волја
Во дебатното гостување во емисијата „Ноќно студио“ на 4ТВ, Суарет Алиша од Коалицијата „Менуваме“ ја отвори суштинската дебата за правното признавање на лицата со попреченост. Неговата порака е јасна: заедницата бара итни уставни измени со кои ќе се стави крај на третманот на овие граѓани како „медицински случаи“ и ќе им се гарантира достоинство преку највисокиот правен акт.
Алиша откри дека веќе е инициран разговор со претседателката Силјановска-Давкова за редефинирање на статусот на лицата со попреченост во Уставот. Главниот аргумент е дека оваа заедница има јасни идентитетски карактеристики кои ја прават специфична.
Влезот во Уставот, според Коалицијата „Менуваме“, би бил пресвртница која ќе овозможи формирање на Народен правобранител за лица со попреченост. Клучниот услов е оваа функција да ја извршува лице кое и самото се соочува со попреченост.
„Сегашните оддели во канцеларијата на Народниот правобранител не ги разбираат нашите реални животни опасности. Ни треба некој што знае колку е страшно кога слепо лице во маркет, поради недостиг на аудио-декларација, наместо шампон може да купи солна киселина“, дециден е Алиша.
Алиша потсети дека уште во 2017 година Обединетите нации упатиле јасни препораки до државниот врв за уставно дефинирање на оваа категорија граѓани, но процесот е во стагнација речиси една деценија. Тој испрати остра критика до сите кои ги потценуваат интелектуалните капацитети на оваа заедница.
„Во 21 век сè уште нè третираат како да не сме здраворазумни. Ние многу добро памтиме што ни е ветено. Ова е наша татковина и нема да престанеме да се бориме сè додека не го добиеме заслуженото место во Уставот“, заклучи тој во интервјуто за 4ТВ.
