Жолто предупредување: Очекувајте дожд и нестабилно време во повеќе региони

Управата за хидрометеоролошки работи (УХМР) издаде жолто предупредување за нестабилни временски услови со врнежи од дожд во повеќе региони низ Македонија.

„Во текот на попладневните часови и во ноќните часови се очекуваат локални врнежи од дожд, на одредени места со поголем интензитет. Во западните предели има услови за појава на грмежи“, соопшти УХМР.

Временските услови утре ќе останат нестабилни, со локални врнежи од дожд, особено во јужните делови, каде што се можни поројни дождови проследени со ретки грмежи.

Во петок и сабота се очекува стабилизирање на времето, додека во недела попладне, во текот на ноќта кон понеделник и во понеделник претпладне повторно се прогнозираат врнежи од дожд, а на планинските предели снег.

Во понеделник ќе дува умерен до засилен северен ветер, што ќе предизвика пад на температурите.