Земјите од Европската унија ќе обучуваат вкупно 30.000 украински војници
Земјите-членки на ЕУ ќе обучуваат дополнителни 15.000 украински војници, со што вкупниот број војници кои ќе поминат обука ќе се искачи на 30.000, соопштија извори од ЕУ, пренесува ДПА. Постоечката мисија за обука започна во ноември има за цел да обезбеди индивидуална, колективна и специјализирана обука за вооружените сили на Украина, се вели во соопштението.
Мисијата има за цел да и помогне на украинската армија да ја одбрани својата територија и да го заштити цивилното население, а беше започната како одговор на украинското барање по руската инвазија. Зголемувањето на бројот на обучени војници се очекува официјално да го објават претседателката на Европската комисија Урсула фон дер Лајен и претседателот на Европскиот совет Шарл Мишел за време на средбата со украинските лидери подоцна оваа недела.
Самитот ЕУ-Украина се одржува во петок. Хрватска не учествува во европскиот проект за обука на украински војници.
