Загрижувачки: Загадувањето на воздухот на „опасно“ ниво
Индискиот главен град Њу Делхи денеска е опкружен со дебел слој токсично загадување.
Поради ова, некои училишта се затворени и има зголемување на здравствените проблеми.
Главниот град на Индија повторно е прв на листата на градови со најзагаден воздух што ја состави швајцарската групација iQAir.
Индискиот главен град претходно во петокот беше на 640 на IQAir скалата, што се смета за „опасно“ ниво. На второ место е пакистанскиот град Лахоре со 335, пренесува Ројтерс.
Регионалните власти рекоа дека загадувањето на воздухот е предизвикано од комбинација на пониски температури, недостаток на ветер и палење на полињата на околните фарми.
Многу од 20-те милиони жители на Њу Делхи се пожалија на печење на очите и болки во грлото бидејќи воздухот стана темно сив.
„Во последните 24 часа видов бебиња како кашлаат, деца кои влегуваат со тешкотии и забрзано дишат“, напиша докторката Ахед Кан од Делхи на социјалната мрежа Х.
Официјалните лица предупредија дека лошиот квалитет на воздухот може да продолжи и во следните две до три недели.
