Загреб имаше сила само за 40 минути, Монпеље оди во четвртфиналето
По нерешените 27-27 на домашен терен, вечерва Загреб загуби со 23-30 и го заврши својот настап во елитното ракометно натпреварување. Хрватскиот тим добро се држеше во првото и на почетокот на второто полувреме, на моменти имаше и +2, но сето тоа до 40. минута кога беше 18-18.
Во следните 12 минути Монпеље направи серија од 6-1 и ги реши сите дилеми околу патникот во четвртфиналето. До крајот, Загреб не успеа да се доближи на помалку од три гола негатива, па победата на францускиот тим и не беше доведена во прашање.
Чупиќ и Фаљиќ беа најефикасни кај Загреб со по четири гола, а прв стрелец на мечот, со шест, беше поранешниот играч на Вардар, Сташ Скубе кој сега е член на Монпеље. Во четвртфиналето, Французите ќе играат со Кил кој директно се пласира меѓу осумте најдобри.
