Заедно сме посилни – пријави ја корупцијата!
Македонското општество со години е исправено пред голем тест – предизвикот наречен корупција, која не е само кршење на законот, туку и огледало на нашата храброст, на нашата решителност и на подготвеноста да се сплотиме кога е најтешко. Токму силата на едно општество не се мери со бројки, туку со свесноста и одлучноста на граѓаните да застанат едни до други и да кажат: доста е! Борбата против корупцијата е моментот во кој можеме да докажеме дека не прифаќаме неправда и не молчиме пред неа.
Токму затоа е започната и кампањата „0% корупција – Ајде да е вистина!“, која се реализира преку проектот „Поддршка на ЕУ за владеење на правото“ во соработка со Министерството за внатрешни работи и повикува секој од нас да преземе активна улога во борбата против корупцијата. Без разлика дали си ученик, родител, доктор, административец или „обичен“ граѓанин, твојот, мојот, нашиот глас и пријава имаат значење.
Кога ќе одлучиме да не молчиме, ќе започнеме со вистинска промена. Кога ќе се охрабриме и ќе пријавиме корупција, ќе направиме чекор со кој ќе почнеме да го уриваме ѕидот на стравот и неказнивоста. Тоа е темел на општество во кое владеат правдата, законот и еднаквоста.
Правосудните институции се тука за да дејствуваат, но нивната моќ зависи и од нашата поддршка. Нивната работа станува поефикасна кога граѓаните се гласни, активни и непомирливи со неправдата.
Затоа, да не чекаме, да не се колебаме! Секоја пријава е сигнал дека не се откажуваме од правдата, дека сакаме иднина без корупција и неправда. Секоја пријава е искра на промена. Ајде да се охрабриме, пријавиме и дејствуваме.
Во оваа борба, секој од нас е важен. Кога ќе се обединиме, кога ќе ја победиме апатијата и ќе ја избереме храброста, тогаш ќе станеме посилни од корупцијата.
Заедно сме посилни – пријави ја корупцијата! „0% корупција – Ајде да е вистина!“
