ЗА ЛАЖНИТЕ ПОТВРДИ ЗА БУГАРСКО ПОТЕКЛО: Почна истрага за градоначалничката на Булќиза
Се шири истрагата за издавањето на лажни потврди за бугарско потекло во Албанија. Албанскиот Висок инспекторат за пријавување и контрола на имот и судир на интереси (ИЛДПКИ), информираше дека е почната управна истрага за градоначалничката на Булќиза, Фестиме Мјештри.
„Откако темелно го разгледавме барањето на пратеничката во албанскиот парламент Дурата Чупи, одлучивме да почне истрага на проверка, постапување и решавање на сомнителниот случај на судир на интереси при вршење на должноста на градоначалничката на Булќиза Фестиме Мјештри“, се наведува во известувањето.
„Врз основа на состојбата на незаконитост и судир на интереси во општина Булќиза, денеска побарав од Високиот инспекторат итно да започне управна истрага, за да се констатира состојбата на судир на интереси меѓу градоначалничката на Булќиза и администраторот на Острени, Љуан Мјештри, кого го назначила таа, а се сестра и брат, како и да преземе други казнени мерки согласно со закон“, наведува меѓу другото Чупи во барањето.
Истражувачката емисија Фикс Фаре, пред неколку недели докажа колку е лесно да се купи потврда за бугарско потекло во Острени и Булќиза, без разлика од кое потекло сте. За 100.000 леки новинарите купиле две такви потврди со печат и потпишани од администраторот на Острени, Љуан Мјештри, потсетува телевизијата.
По емисијата, полицијата ги уапси Мјештри (62) и А. Л. (33) раководител на секторот за социјалната заштита и двајцата жители на Острени, како и Фитим Бала (61) жител во Требиште, со функција секретар на Советот на општина Булќиза, рударско гратче кое се наоѓа на албанско-македонската граница, на дваесеттина километри од Дебар.
Тројцата на итна седница на Советот беа разрешени, а судот во Пешкопеа им изрече мерка притвор.
Дел од советниците тогаш побараа оставка од градоначалничката Мјештри, која е од Социјалистичката партија.
