Вработените од „Флораком“ и „Луна“ на протест – ќе останат на улица сѐ додека не добијат плата!
Вработените во фирмите-ќерки „Флораком“ и „Луна“, кои се дел од Јавното претпријатие „Паркови и зеленило“, и денеска ја блокираа улицата Илинденска. И покрај вчерашната исплата на платите за нивните колеги од матичното претпријатие, околу седумдесетмината вработени во „Флораком“ и „Луна“ останаа без августовската плата и, што е најзагрижувачко, без здравствено осигурување.
По тридневни протести и блокади, вработените од „Паркови и зеленило“ вчера ја добија својата плата. Сепак, овој успех не ги опфати и работниците од двете ДООЕЛ претпријатија. Денешната дводневна блокада беше одржана на дожд, а демонстрантите се категорични: ќе останат на улица сѐ додека не добијат исплата.
Претседателот на Синдикатот за комунално стопанство (СУТКОЗ), Стојанче Кашиковски, предупреди дека протестите ќе продолжат и во наредните денови доколку не се реши проблемот со платите.
„Доколку и денес не биде исплатена платата за месец август, ќе продолжиме со протест. Најголем проблем е што вработените од ДООЕЛ ‘Флораком’ и ДООЕЛ ‘Луна’ од вчерашниот ден се оставени и без здравствено осигурување“, изјави Кашиковски.
Тој ја потенцираше итната ситуација, нагласувајќи дека во двете фирми има голем број вработени кои се хронично болни.
„Како што напомнавме во повеќе наврати, овие лица не можат да ја земат својата редовна терапија поради тоа што останаа без здравствено покритие“, додаде претседателот на СУТКОЗ.
