Возило заглавило во вода во Тетово, го ваделе пожарникари
ЦУК: 1 739 повици на 112 во последното деноноќие.
Регионалниот ЦУК Тетово, известува дека пожарникарите од Територијалната противпожарна единица (ТППЕ) Тетово во изминатото деноноќие имале една помала интервенција за вадење на заглавено возило во вода што била собрана под надвозникот во населбата „Деребој“.
ЦУК издвојува неколку информации важни за граѓаните од сферата на проодноста на патната локална мрежа.
Регионалниот ЦУК Куманово, ја пренесува информацијата од Општина Крива Паланка дека стариот Манастирски пат е времено затворен за сообраќај, заради санација на свлечиште и изведба на истражни работи преку длабински истражни дупнатини на оваа локација од страна на Друштвото за градежништво „ГЕИНГ“ доо. Во наредниот период, заради изведување на градежни работи, ќе биде затворен за сообраќај делот од ул. „Св.Јоаким Осоговски“ на потегот од долот во населбата „Единство“ до влез на Зелен пазар, во должина од околу 200 метри. Исто така, делот од пристапниот пат кон ул. „Калин Камен“ (над свлечиштето на ул. „Св. Јоаким Ососговски“ кај Осички Мост) е веќе целосно затворен за сообраќај заради изведба на истражни работи преку изведување длабински дупнатини на оваа локација.
Регионалниот ЦУК Скопје, ја пренесува информацијата од ЈСП Скопје дека, заради градежни работи на пат, автобусите на линиите 18, 54 и 63а во еден дел на нивната линија имаат изменета траса на движење.
Фото: Архива
