Во Македонија годишно од загаден воздух умираат повеќе од три илјади луѓе
Главните извори на загадување на воздухот во земјата се согорувањето отпад, градежната прашина, производството на електрична енергија, недостатокот на еколошки јавен превоз и користењето дрва во домаќинствата. Ова беше истакнато на седницата на Комисијата за здравство во Собранието, каде што се дискутираа сериозните здравствени последици од загадувањето. Експертите од невладините организации нагласија потреба од итна акција, воведување системски мерки и долгорочни решенија за намалување на загадувањето и заштита на јавното здравје, пишува Телма.
„Сите овие податоци ни кажуваат дека за да се справиме со аерозагадувањето не можеме само да поентираме кон еден извор туку мораме на сите овие извори да работиме паралелно. За сите тие извори се одговорни различни чинители, некаде е индустрија, некаде транспорт, но најважно е да се фокусираме да обезбедиме алтернативни начини за греење на домаќинства и јавни објекти“, истакна Бојана Станојевска Пецуровска од Центар за климатски промени.
Од невладините организации велат дека е неопходно зголемување на буџетот за животна средина, воведување интегрирани дозволи за индустриските капацитети, строга контрола на согорувањето отпад и намалување на емисиите од транспортот. Очекувањата се дека сите овие работи ќе помогнат да се намали смртноста од аерозагадувањето, затоа што земјава е меѓу оние со најголем број вакви случаи во Европа.
„Во Скопје годишно умираат околу 1.200 луѓе како резултат на загаден воздух. Според статистиката на УНИЦЕФ 11,6% од смртните случаи кај доенчиња под една година се поврзани со аерозагадувањето“, потенцираше Ели Пешева од О2 Иницијатива.
Според податоците во Македонија годишно од загаден воздух умираат повеќе од три илјади луѓе. Лекарите постојано нагласуваат дека загадениот воздух предизвикува респираторни и кардиоваскуларни заболувања.
