Владата ја утврди квотата: 10.000 странски работници во 2026 година
Во пресрет на новите економски политики и потребите на пазарот на труд, Владата ја усвои годишната квота за ангажман на странска работна сила во 2026 година. Согласно одлуката, ќе бидат издадени вкупно 10.000 работни дозволи за странски државјани.
Од вкупната квота, 9.750 дозволи се предвидени за редовно вработување на странци, додека 200 дозволи се наменети за упатени работници. Дополнително, 50 дозволи се резервирани за сезонски ангажмани.
Во структурата на квотата, 4.500 дозволи се однесуваат на нови вработувања, а 5.250 на продолжување на дозволите за странци кои веќе се ангажирани во државата.
Од Министерството за економија и труд најавуваат дека континуирано ќе се следи искористеноста на дозволите и состојбата на пазарот на труд, со цел навремено прилагодување на мерките согласно потребите на економијата.
Одлуката стапува во сила од денес, 16 јануари 2026 година.
