Влада: За три дена 109 повредени лица од Кочани ги доставија своите барања и предлози, ги охрабруваме и другите истото да го направат

Во рок од три дена од пуштање во функција на телефонската линија за повредените лица од несреќата во Кочани, 109 граѓани ја искористија можноста да ги достават своите барања и предлози до кабинетот на премиерот.

Линијата 070/355-526 е воспоставена како дел од мерките за поддршка на повредените и нивните семејства и има директна врска со Канцеларијата на Претседателот на Владата. Веќе во првите 72 часа, Владата доби јасни сигнали дека граѓаните имаат конкретни потреби и очекувања.

Како дел од пакетот мерки, Владата одлучи да обезбеди бесплатна рехабилитација во рехабилитацискиот центар во Пониква за сите повредени лица кои се во стабилна здравствена состојба, но им е потребна дополнителна медицинска и психолошка нега. Тим од лекари ќе работи во Пониква од 10 јуни до 20 август, со цел да ги поддржи сите пријавени повредени.

Владата ги охрабрува и останатите граѓани кои претрпеле повреди во кочанската несреќа да се јават на телефонската линија и да ги достават своите барања. Според владината прес-служба, оваа иницијатива е дел од заложбите „државата да биде на патот на промените и да создаде конкретни резултати во интерес на граѓаните“.