НА ВЛЕН МУ ОДГОВАРААТ ПРЕДВРЕМЕНИ, АМА ЗА СТАБИЛНОСТА СЕ ПОТРЕБНИ РЕДОВНИ ИЗБОРИ Гаши уверен дека сега ВЛЕН би освоил повеќе пратеници од ДУИ
Претседателот на Собранието, Африм Гаши, смета дека партиите треба да седнат на разговор за измените на Законот за јавните набавки, за кои се поднесени 2.158 амандмани, а ако нема договор Собранието ќе ги разгледа амандманите во роковите предвидени со Деловникот.
– Во овој случај, мислам ако има толку многу амандмани, ние сме парламентарна демократија, Собранието е место каде што се разговара, ќе треба да се најде начин да се дојде до решение – рече Гаши во интервју за „360 степени“ на МРТ 1.
Прашан дали веќе разговарал со координаторите на пратеничките групи, претседателот на Собранието истакна дека денеска, од објективни причини немало координација и оти позициите на партиите се познати.
Измените се прва точка на дневниот ред на утрешната пленарна седница, но на прашањето дали пратениците ќе почнат со нив или предност ќе добие ребалансот на буџетот, Гаши рече дека вообичаено кога е во прашање ребалансот се почнува со него.
Според него, суштината на измените е при изборот на најдобрата понуда, покрај цената, да се вреднува и квалитетот.
– Никој нема намера, најмалку мнозинството во овој случај да протне нешто – рече Гаши.
Законот за јавни набавки утре се враќа на трето читање откако претседателката Гордана Сиљановска-Давкова не го потпиша указот за измените што Собранието ги усвои на 26 октомври.
Тој зборуваше и за парламентарните избори и изрази убедување дека ќе се одржат во редовниот термин, иако, според неговата процена, на ВЛЕН би му одговарало да се гласа сега. Тој вели дека од евентуални предвремени избори не очекува позначајна промена во односот на силите меѓу ВМРО-ДПМНЕ и СДСМ, но очекува подобар резултат за ВЛЕН во однос на ДУИ.
– Но, не мислам заради интересот на една политичка партија треба да се оди на избори и да се поремети овој принцип за кој верувам дека има поголеми ефекти во општеството, во државата, да креираме заеднички политичка стабилност секои 4 години. Неколку последователни изборни циклуси во кои парламентот би го завршил четиригодишниот мандат би придонеле за политичка стабилност – вели претседателот на Собранието.
На прашање дали има проблем во партијата со договарање на кадрите и дали заменик-министерското место во МВР може да биде една од точките на раздор помеѓу лидерите во ВЛЕН, Гаши рече дека нема сознанија за такви проблеми, ниту во ВЛЕН, ниту меѓу ВЛЕН и ВМРО-ДПМНЕ.
Додаде дека иако ВЛЕН е хетерогена партија, сепак многу брзо оди кон хомогенизација.
– Гледаме силни елементи на хомогенизација наспроти политичките партии кои изгледаат унисоно, имаат поголема традиција, а внатре имаат големи раздори во повеќе фракции. Така што, мислам дека ако се споредуваме со другите политички партии, ние одиме кон кон хомогенизација, конвергираме. Тој процес може да потрае и нормално дека треба да трае. Јас не сум човек кој сака да ги прикрие работите. Тоа е четири партии да зближите, прво дасе организира конгрес, да се донесе одлука дека ќе бидеме една партија, не е лесна работа. Сите кои се бават со политика секаде во светот ќе ви кажат дека тоа е ѓаволски тешка работа. Но, и потоа ни останува работа на сите нас кои сме внатре да да работиме на хомогенизација на ВЛЕН – рече Гаши.
.
Извор: plusinfo.mk
