Клучна победа за Македонија: Ивановски и Мицов обезбедија триумф над Молдавија во Дејвис купот

Македонската тениска репрезентација попладнево забележа голема победа во третото коло од Дејвис купот, откако Калин Ивановски и Стефан Мицов триумфираа во драматичната дубл пресметка против Молдавија, носејќи ѝ на Македонија вкупна победа од 2-1.

Првиот поен за македонскиот тим го донесе Стефан Мицов во сингл дуелот, по што Молдавија успеа да израмни. Одлучувачки беше мечот во двојки на Централниот терен на ТК „Југ“, каде што Ивановски и Мицов покажаа борбеност и зрелост во клучните моменти.

Во првиот сет до 3:3 немаше брејкови, но македонскиот пар потоа направи пресврт и со резултат од 6:4 го освои воведниот сет. Иако добро го започнаа вториот сет и поведоа со 2:0, противничкиот пар возврати со брејк и дојде до водство од 4:3. Сетот се решаваше во тајбрејк, каде што македонските тенисери имаа две меч топки, но контроверзна ситуација кај поен во кој двајцата молдавски тенисери ја удрија топката не беше санкционирана од судијата, па Молдавија го освои сетот.

Во одлучувачкиот трет сет, Ивановски и Мицов направија брејк во четвртиот гем и го одржаа водството до крај, победувајќи со 6:3. Целиот меч траеше 2 часа и 17 минути.

Со овој триумф Македонија сега има биланс од две победи и еден пораз, исто како Молдавија и Црна Гора, и се доближува на чекор до пласман во Втората Светска група.

Табела по 3. коло:

Летонија 3-0

Црна Гора 2-1

Молдавија 2-1

Македонија 2-1

Малта 0-3

Ерменија 0-3

Македонија утре ќе се соочи со аутсајдерот Ерменија во натпревар од четвртото коло и има шанса дополнително да го зацврсти својот пат кон Втората Светска група.