Важно за пензионерите: Од денеска почнува продолжувањето на билетите за 2026 – внимавајте на рокот за да не ви ги блокираат

Јавното сообраќајно претпријатие (ЈСП) Скопје ги известува корисниците на бесплатниот превоз од категоријата возрасни лица дека од денеска, 15 декември 2025 година, започнува процесот на редовна годишна заверка на билетите за наредната 2026 година.

Ова се однесува на граѓаните од старосната група над 62 години за жени и над 64 години за мажи.

Од претпријатието потенцираат дека заверката може да се изврши во кој било од центрите за персонализација на ЈСП низ Скопје. Клучен услов е процедурата да се реализира исклучиво лично од страна на корисникот. Притоа, задолжително е приложување на документ за лична идентификација (лична карта).

ЈСП упати и предупредување за роковите. Сите билети од оваа категорија кои нема да бидат навремено заверени, односно најдоцна до 31 јануари 2026 година, ќе бидат автоматски блокирани и нема да можат да се користат за превоз од 1 февруари.

Поради ова, се апелира до корисниците навремено да ја завршат обврската за да избегнат гужви и прекин во користењето на услугата.