Вјоса Османи го обвини Вучиќ дека го спроведува планот на Путин
Не смееме да дозволиме Вучиќ да го спроведе планот на Путин, вели косовската претседателка Вјоса Османи.
Таа ја обвини Србија дека има за цел да спроведе дестабилизирачки план на Западен Балкан, сличен на оној што, како што рече, Русија го спроведе во Украина во 2014 година. Османи, која престојуваше во официјална посета на Албанија, изјави дека сите демократски држави во регионот не треба да дозволат реализација на овој план.
„Ситуацијата на северот не го влоши косовско-српскиот дијалог. Србија е таа која секогаш ја влошува ситуацијата во нашиот регион преку чести напади на Косово. Нема недела, а некој од Србија да не ги напаѓа косовските полицајци кои се на територијата на Косово. Со строго спроведување на планот што Путин го спроведе во 2014 година против Украина, Вучиќ и Србија имаат за цел да го дестабилизираат целиот Западен Балкан, и преку дестабилизација на нашиот регион да гo нападнат системот на вредности на кои сe ЕУ и НАТО“, изјави Османи.
Од друга страна, албанскиот претседател Бајрам Бегај рече дека „Албанија силно ги поддржува аспирациите на Косово за евроатлантска интеграција“, додавајќи дека „никој не треба да се прашува зошто Косово е национален приоритет на Албанија“.
ЕУ бара избори во северно Косово.
„Важно е што поскоро да се организираат локални избори на северот на Косово, на кои Србите ќе учествуваат без никакви предуслови“, изјави портпаролот на Европската унија, Петер Стано, јави дописникот на МИА од Белград.
Претходно, Србите бојкотираа и победија градоначалници од албанска националност што создаде криза на Косово.
foto Facebook/Vjosa Osmani
