Турската влада е против царски рез, но бројките зборуваат сами за себе: Над 6 од 10 бебиња се раѓаат хируршки

Бројот на раѓања со царски рез во Турција достигна нов рекорд – 61,5 отсто од сите раѓања во 2023 година биле оперативни, покажуваат официјалните податоци цитирани од ТВ Хабертурк. Од вкупно 958 илјади родени бебиња во текот на годината, близу 590 илјади се родени со царски рез.

Ова се случува во позадина на напорите на турските власти да ја ограничат оваа практика .

Само пред неколку дена, владата воведе забрана за планирани царски резови во приватни медицински центри – мерка објавена во Државниот весник и наиде на незадоволство од јавноста. Конзервативната влада на претседателот Реџеп Таип Ердоган веќе води кампања против високата стапка на царски резови.

Податоците покажуваат постојан нагорен тренд во последната деценија: од 51,1% во 2014 година, процентот на царски рез е зголемен за над 10%. Во 2022 година изнесуваше 60,1%, во 2021 година – 58,4%, а во 2020 година – 57,3%.

Светската здравствена организација препорачува оперативните раѓања да не надминуваат 15% од сите случаи. Сепак, Турција со години е меѓу земјите со најголем удел.

Во 2017 година учеството беше 53,1%, додека во Бугарија беше 43%, во Романија – 44%, во Австрија – 29,3%, во Франција – 19,7%, а во Норвешка – 16%.