Судот го одобри обвинението против Васил Јованов за несреќата на Партизанска во која загина 22-годишната Фросина Кулакова

Обвинителниот акт против Васил Јованов, осомничен за сообраќајката на булеварот Партизански одреди во која загина 22-годишната Фросина Кулакова, е одобрен од Кривичниот суд во Скопје.

„Советот за оценка на обвинителен акт го одобри обвинението на Основното јавно обвинителство со број КО 271/25 од 27.03.2025 година, против В.Ј. за кривично дело – Тешки дела против безбедноста на луѓето и имотот во сообраќајот“, информираа од Кривичниот суд.

Со оваа одлука се формира кривичен предмет под број К.бр. 780/25 кој ќе биде распределен за понатамошно судење преку електронскиот АКМИС-систем.

Од Судот додадоа дека странките и јавноста ќе бидат известени кога ќе биде закажан терминот за главната расправа.

Несреќата која се случи на крајот на јануари предизвика бурни реакции во јавноста, откако беше објавено дека младата Фросина загинала по удар од возило на Партизанска, во момент кога се движела по пешачка патека.