„ТОЈ НЕ Е ДЕЛ ОД НАШЕТО СЕМЕЈСТВО“ Тројца претседатели одбија да се фотографираат заедно на самитот КОП28
ПРЕТСЕДАТЕЛИТЕ на Литванија, Летонија и Полска денеска одбија да учествуваат на официјалната заедничка фотосесија на светските лидери на климатскиот самит КОП 28 во Дубаи, во Обединетите Арапски Емирати, поради присуството на белорускиот претседател Александар Лукашенко.
– Претседателот на Полска Анджеј Дуда не се фотографираше за групна фотографија на учесниците на климатскиот самит COP28 во Дубаи.Причината е присуството на диктаторот на Белорусија Александар Лукашенко. Ниту претседателите на Литванија и Летонија, Гитанас Науседа и Рдгарс Ринкевичс не позираа со претседателот Анджеј Дуда – објави на платформата Х, шефот на кабинетот на полскиот претседател Гражина Игнацак Бандих, пренесува полската агенција ПАП.
На шефовите на држави и влади кои се собраа во Дубаи на преговорите за климата во ОН им се придружи Лукашенко, кого лидерите на Европската унија (ЕУ) го обвинуваат за репресија врз белоруската опозиција и за сојуз со Русија, која изврши агресија против Украина.
– Би било лицемерно да се застане рамо до рамо со лидерот на земја која стана задна база за руската агресија против Украина и да зборуваме за иднината на светот и климатските промени како да не е ништо – рече Наузеда.
Тој додаде дека заедничката фотографија се нарекува и „семејна“ и дека Лукашенко „не е дел од нашето семејство“.
Литванија и Летонија, две поранешни советски републики, се меѓу најжестоките руски критичари и поборници за зголемување на огромната воена помош за Киев. Двете земји и Полска ги обвинија властите во Минск дека стојат зад масовниот прилив на мигранти во ЕУ, во обид да го дестабилизираат регионот.
