ЌЕ СЕ ДОНЕСЕ НОВ ЗАКОН ЗА КВАЛИТЕТОТ НА ВОЗДУХОТ Со буџет од 1,5 милион евра од ЕУ се подготвени и 7 нови правилници
Со буџет од 1,5 милион евра во изминатите 2 години се подготвени законски решенија за кои надлежните очекуваат дека ќе придонесат кон подобрување на амбиенталниот воздух.
Подготвен е нацрт на новиот закон за квалитетот на амбиенталниот воздух, како и 7 нови подзаконски акти и измени на уште еден подзаконски акт, како и планови за имплементација на 3 европски директиви.
Министерот за животна средина и просторно планирање Муамет Хоџа вели дека ова е важен чекор кон усогласување со европските стандарди.
– Но, уште поважно е законските решенија да овозможат поефикасно следење на загадувањето и посилно спроведување на мерките. Напредок е постигнат и во националното планирање. Подготвени се нацрт-националниот план за квалитетот на воздухот за периодот 2027-2031 година и националната програма за контрола на загадувањето на воздухот за периодот 2027-2037 година – истакна Хоџа на завршниот настан што се одржа во Скопје.
Сепак, вели Хоџа, подготвените закони, планови и анализи сами по себе нема да го исчистат воздухот. Вистинскиот тест е доследното спроведување на мерките и постигнувањето видливи резултати за граѓаните.
– За тоа се потребни јасни одговорности, соодветно финансирање и координација меѓу сите надлежни институции. Министерството има важна улога, но ниедна институција не може сама да го реши овој проблем. Потребни се заеднички напори на централната и локалната власт, стручната јавност и сите оние што можат да придонесат за подобрување на квалитетот на воздухот – рече министерот Хоџа.
Проектот што се спроведуваше во изминатите две години со поддршка на Европската Унија дава и препорака за основање агенција за заштита на животната средина, нешто што го има во европските држави.
Амбасадорот на ЕУ Михалис Рокас рече дека ова е добра практика.
– Секоја земја членка на Европската Унија има слична агенција за заштита на животната средина. Иако нивните имиња може да се разликуваат, нивните надлежности се слични. Министерството обезбедува политичко лидерство, а агенциите во земјите членки го следат усогласувањето со стандардите за животната средина, вклучително и стандардите за квалитетот на воздухот. Овие агенции претставуваат техничка и научна поддршка за унапредување на политиките. Тие служат и како мост за усогласување на националното законодавство со целокупното законодавство на ЕУ во областа на животната средина, како и за негово спроведување на национално ниво – појасни Рокас.
Тој рече дека квалитетот на воздухот е подобар во земјите од ЕУ поради правилата од Зелениот договор и казните што ги добиваат загадувачите.
– Проектот доаѓа до својот крај, но зад себе ја остава поставената правна основа – семе што во блиска иднина може да донесе суштински промени во животот на граѓаните. Пред сè, новиот закон за управување со квалитетот на воздухот, изработен во рамките на овој проект, сега треба да биде усвоен и доследно да се спроведува. Затоа сметам на вашата поддршка во понатамошните чекори за негово усвојување. Потоа потребно е да се развијат и да се применат соодветните подзаконски акти – порача Рокас.
Проектот „Поддршка во спроведувањето на директивите за квалитет на воздухот“ е кофинансиран од Европската Унија преку Инструментот за претпристапна помош ИПА II.
.
Извор: plusinfo.mk
