ТАРИФНИТЕ ТЕНЗИИ РАСТАТ: Трамп со нови закани, ескалира конфликтот – „Не ни требаат вашите производи“
Американскиот претседател Доналд Трамп повторно ги критикуваше канадските власти и рече дека Америка наскоро ќе покаже дека не и требаат канадски производи.
Во објава на социјалната мрежа Truth Social, Трамп рече дека Канада најавила воведување дополнителни царини за САД.
„И покрај фактот што Канада им наплаќа на САД од 250 до 390 проценти тарифи на многу од нашите земјоделски производи, Онтарио штотуку објави доплата од 25 отсто на „електричната енергија“, за сите работи, а вам дури и не ви е дозволено да го правите тоа. Бидејќи нашите тарифи се реципрочни, само ќе го вратиме сето тоа на 2 април. Канада е злоупотребувач на тарифите и отсекогаш била, но Соединетите Држави повеќе нема да ја субвенционираат Канада. Не ни требаат вашите автомобили, не ни треба вашата граѓа, не ни е вашата енергија потребна и многу брзо ќе го дознаете тоа. НАПРАВИ ЈА АМЕРИКА ПОВТОРНО ОДЛИЧНА!!!“, напиша Трамп на неговата социјална мрежа.
Премиерот на Онтарио, лидер на најнаселената провинција во Канада, објави дека од понеделник наплаќа 25 отсто повеќе струја за 1,5 милиони Американци како одговор на трговската војна на американскиот претседател Доналд Трамп.
Онтарио ги снабдува со електрична енергија Њујорк, Минесота и Мичиген.
„Нема да се двоумам да ја зголемам оваа такса. Ако САД ескалира, нема да се двоумам целосно да го исклучам напојувањето. Верувајте ми кога велам дека не сакам да го правам ова. Се чувствувам ужасно за американскиот народ кој не ја започна оваа трговска војна. Едно лице е одговорно, а тоа е претседателот Трамп“, рече водачот на провинцијата Даг Форд.
