Стојаноски: Минималната плата мора да расте одржливо, не по цена на економски шок
Зголемувањето на минималната плата треба да се темели на реални економски параметри и одржливи модели, а не на, како што беше оценето, нереални барања што можат да создадат сериозни финансиски последици. Ова го истакна пратеникот Бојан Стојаноски во гостување на „Ноќно студио“ на 4TV.mk.
Тој нагласи дека Владата се залага за подобрување на животниот стандард, но преку пристап што нема да ја продлабочи сивата економија и нема да предизвика нарушување на фискалната стабилност.
Стојаноски посочи дека евентуално прифаќање на предлогот за минимална плата од 600 евра во овој момент би било сериозен товар за буџетот.
Според него, согласно Општиот колективен договор, секое зголемување на минималната плата повлекува линеарно покачување на платите во државната администрација.
„Ако минималната плата порасне на 600 евра, тоа е раст од 61%. За да се покрие ова покачување низ целиот јавен сектор, на државата ќе ѝ бидат потребни околу милијарда и 250 милиони евра дополнителни средства,“ предупреди Стојаноски.
Тој додаде дека ваквиот чекор би значел или откажување од капитални инвестиции како патишта, училишта и болници, или ново задолжување во период кога, како што рече, државата треба да врати околу 6 милијарди евра стари долгови во наредните три години.
Покрај буџетските импликации, според Стојаноски, сериозен притисок би се создал и врз приватните компании. Тој оцени дека наглото зголемување на платите може да ги стави работодавачите пред избор меѓу затворање на фирмите, отпуштање на работници или неформални исплати.
„Нашиот интерес не е фиктивна плата на хартија, туку реални пари на сметката на работникот. Вештачкиот раст само ќе ја зголеми сивата економија,“ изјави тој.
Во своето излагање, Стојаноски упати критики и кон опозицијата, оценувајќи дека не понудила кредибилни решенија во изминатите години. Тој го спомена и претседателот на Сојуз на синдикати на Македонија, Слободан Трендафилов, во контекст на, како што рече, променливите барања за висината на минималната плата.
„Пред само две години минималната плата беше 400 евра. Сега се бараат 600, па се закануваат со 700 евра. Тоа не е економска логика, туку политички притисок. Ние велиме: нека седнат работниците и работодавачите, нека се договорат колку едните можат реално да исплатат, а ние како Влада ќе го гарантираме тој договор,“ заклучи Стојаноски.
