Има ли шанса Украина наскоро да се приклучи во ЕУ?
Универзитетскиот професор Александар Спасеновски во анализа за 4TV.mk оцени дека актуелните геополитички случувања имаат „тектонски и драстичен карактер“, ако се земе предвид отстапувањето од досегашните воспоставени практики во меѓународните односи.
Според него, кога промените се толку изразени, и одговорот на нив е подеднакво силен. Како пример посочи дека пред само пет години би звучело нереално во Брисел да се разговара за членство на Украјна во Европска Унија, како и за приклучување на Молдавија. Исто така, додаде дека тогаш би изгледало неверојатно да има масовни протести во Грузија со барање за членство во Унијата.
„Денес гледаме дека тоа е реалност“, истакна Спасеновски, нагласувајќи дека не би се изненадил доколку во одредена политичка конфигурација група држави – меѓу кои дел од земјите од Западен Балкан, како Албанија, Македонија и Босна и Херцеговина, но и Украина и Молдавија – воспостават поблиски односи со Европската Унија.
Тој посочи дека останува отворено прашањето дали тоа би значело целосна економска интеграција со постепена политичка интеграција или некоја поинаква форма на приклучување. Сепак, според него, не е исклучено овие процеси да започнат и да станат дел од поширок мировен план, кој би подразбирал ново редефинирање на односите меѓу големите сили на европскиот континент и на глобално ниво.
