Сијарто до Америка: Никој oд надвор не може да ни каже како да живееме
Унгарскиот министер за надворешни работи, Петер Сијатро вели дека заврши времето кога Америка се мешаше.
Тој го обвини американскиот амбасадор во Будимпешта дека се обидува да се меша во внатрешните работи на земјата, пренесе Асошиетед прес. Вчера Сијарто одржа прес-конференција по повод изјавата на амбасадорот Дејвид Пресман за магазинот „Политико“ за пристапот на Унгарија кон војната во соседна Украина, која американскиот дипломат ја опиша како „политика одобрена од Путин“.
„Не е негова работа да се меша во внатрешните работи на Унгарија“, рече Сијарто.
Пресман, кој беше назначен од администрацијата на Бајден, претходно беше постојан претставник на САД во Обединетите нации за специјални политички прашања.
„Таа ера е завршена. Унгарија е суверена земја. Никој oд надвор не може да ни каже како да живееме“, додаде министерот.
Унгарија е против санкциите воведени за Русија. Дури унгарскиот премиер Виктор Орбан деновиве ги повика Украинците да престанат да се борат, затоа што Русија секако ќе победи. Тој ја нарече Украина „ничија земја“, со што ги налути украинските власти.
Орбан лани предизвика реакции откако се појави со шал на кој имаше мапа на „Голема Унгарија“. Украина остро реагираше на овој потег на Орбан.
