Јахији повикува на обединување пред вториот круг во Брвеница: „Трката меѓу АКИ и ВЛЕН заврши!“
Кандидатот на Националната алијанса за интеграција (НАИ), Аркин Јахији, упати порака за обединување пред вториот круг од локалните избори во Брвеница, во кој ќе се соочи со кандидатот на ВМРО-ДПМНЕ, Стојанчо Радичевски.
Во објава на социјалните мрежи, Јахији порача дека партиската конкуренција меѓу НАИ и ВЛЕН завршила со првиот изборен круг на 18 октомври и дека сега фокусот треба да биде ставен на заедничката цел.
„Трката меѓу АКИ и ВЛЕН заврши на 18 октомври. Сега сите сме заедно и имаме друга мисија!“, напиша Јахији.
Тој нагласи дека отсекогаш се залагал за обединување кога тоа било потребно, додавајќи дека партиските бои никогаш немале пресудно значење во Брвеница.
Јахији ги повика граѓаните масовно да излезат на гласање на 1 ноември и да ги повикаат и останатите да го сторат истото.
„Да гласаме за промени, да гласаме за достоинство“, порача кандидатот на НАИ.
Пораката доаѓа во чувствителен момент од изборната кампања, откако кандидатот на ВЛЕН, Јакуп Хусеини, не успеа да обезбеди пласман во вториот круг.
На првиот круг, одржан на 18 октомври, Стојанчо Радичевски освои 2.943 гласа, Аркин Јахији 2.152, а Јакуп Хусеини 1.528 гласа.
Вториот круг во Брвеница ќе се одржи на 1 ноември, кога гласачите ќе одлучат кој ќе ја преземе градоначалничката функција.
Останува да се види во колкава мера повикот за обединување ќе се одрази врз излезноста и врз одлуката на гласачите во вториот круг./Novina
