Сиљановска-Давкова: Членките на Судскиот совет ги избрав според стручноста и професионалниот кредибилитет
Претседателката Гордана Сиљановска-Давкова на денешната седница на Собранието ги образложи предлозите за избор на Алинда Кадри-Шакиновиќ и Сузана Јошевска-Анастасовска за членки на Судскиот совет.
Во своето излагање, претседателката посочи дека кандидатките ги предложила врз основа на нивната стручност, компетентност и професионален интегритет. Таа потенцираше дека правосудните реформи треба да ги водат личности кои се препознатливи во своите области и кои уживаат висок личен и професионален кредибилитет.
– Судскиот совет во јавноста се перцепира како фактор што придонел кон кризни состојби во судството. Кандидатките не ги предложив затоа што се жени, туку заради нивната стручност и компетентност – истакна Сиљановска-Давкова.
Претседателката дополнително нагласи дека покрај професионалните квалитети, етичката димензија е неопходна за независно и функционално судство.
– Судскиот совет е рентгенот и микроскопот на судството. Во него треба да седат луѓе кои ќе оценуваат врз основа на квалификации, но и врз основа на интегритет и достоинство. Во правото најважни се законитоста, уставноста и етиката – рече таа, додавајќи дека токму овие стандарди се неопходни при избор, разрешување и дисциплинска одговорност на судиите.
Сиљановска-Давкова оцени дека реформите во правосудството започнуваат од Судскиот совет, со очекување новиот состав да донесе поголема отчетност и аргументирани извештаи кои, како што рече, нема само да ги лоцираат проблемите, туку и да понудат решенија.
