Шкендија се збогува со репрезентативецот Бејтулаи, кој е пред промоција во Тирана

Бејтулаи кој во Шкендија дојде како младинец од Тетекс уште пред една деценија, одигра 304 меча, беше капитен и заменик капитен на тимот во својот период во црвено-црниот дрес и освои три шампионски титули и два трофеи во Купот на Македонија.

Шкендија му се заблагодари на Бејтулаи за сиот придонес и му посака среќа во новите предизвици. Тој според последните информации веќе има договор со Тирана, а ќе биде промовиран после репрезентативните активности со македонската селекција.

Инаку Бејтулаи беше дел од златната младинска генерација на Македонија која играше на Еуро 2017, а потоа и дел од сениорскиот состав со историскиот настап на Еуро 2020.

Од Шкендија летово веќе си заминаа иконата на клубот Ферхан Хасани, кој направи трансфер во Хелсингор, како и од пред неколку дена Љупчо Дориев по три сезони минати во црвено-црните по доаѓањето од Академија Пандев.