Се бара враќање на автономијата – реакции на предлог-законот за високо образование
Јавната расправа за Предлог-законот за високо образование отвори прашања поврзани со организацијата, управувањето и степенот на самостојност на државните универзитети. На дебата одржана на Филолошкиот факултет, претставници од академската заедница изнесоа забелешки и предлози за измена на одредени решенија.
Ректорката на Универзитетот „Св. Кирил и Методиј“, Биљана Ангелова, побара отстранување на регулативата со која, според неа, се намалува автономијата на универзитетот. Таа очекува зачувување на финансиската, кадровската и организациската самостојност на УКИМ.
„Тоа е пред сѐ во делот на органите на управување на универзитетот… Треба да ни се остави слобода и понатаму да можеме сами да ги воспоставуваме критериумите без согласност, со слободна флуктуација или мобилност од еден на друг универзитет“, изјави Ангелова.
Реакции пристигнаа и од уметничките факултети, кои посочија дека во предложениот текст не се доволно земени предвид нивните специфики. Деканите нагласија дека одредени решенија може да бидат тешко применливи во пракса поради природата на наставата.
Министерката за образование и наука, Весна Јаневска, изјави дека јавната дебата има за цел подобрување на текстот на законот и дека сите предлози ќе бидат разгледани пред тој да биде доставен до Владата. Таа додаде дека Министерството соработува со универзитетите во процесот на изработка на законските решенија.
Предлог-законот, по завршувањето на јавните консултации, ќе биде поставен на платформата ЕНЕР, по што следуваат натамошните институционални процедури.
