ЛЕФКОВ НАЈАВИ КРИВИЧНА ЗА ЈОН ФРЧКОСКИ Го повика Обвинителството да ги испита фотките и изјавата „Си пробал? Те сликале“
Пратеникот на ВМРО-ДПМНЕ Миле Лефков најави дека денеска ќе поднесе кривична пријава против Јон Фрчкоски од СДСМ и непознати лица. Тој рече дека ќе побара од надлежните институции да ги испитаат јавно објавените фотографии и изјавите на Фрчкоски.
„Денес по електронски пат ќе поднесам кривична пријава против Јон Фрчкоски и непознати лица, а истата ќе ја доставам и до архивата. Барам надлежните институции да утврдат што навистина стои зад јавно објавените фотографии и твојата изјава ‘Си пробал? Те сликале’“, рече Лефков.
Тој побара да се испита дали во случајот постојат дејствија што би можеле да бидат опфатени со одредби од Кривичниот законик. Станува збор за наводи и барање на Лефков до институциите, а не за утврдено постоење кривично дело.
„Со пријавата барам да се испита евентуалното постоење на дејствија опфатени со членовите 215 и 216 од Кривичниот законик, како и дали постојат основи за примена на членот 364, непријавување кривично дело од тебе или од твои блиски“, изјави Лефков.
Најавата доаѓа по јавните препукувања меѓу Лефков и Фрчкоски, во кои беа изнесени меѓусебни обвинувања поврзани со употреба на наркотични средства. Лефков на прес-конференцијата категорично ги отфрли обвинувањата упатени кон него.
„Немам слабост ниту кон алкохол, ниту кон наркотици. Никогаш не сум користел наркотични средства и тоа е факт. А мојот најважен тест се моето семејство и моите пријатели. Ако мислиш дека сум направил кривично дело, повели, пријави ме“, рече Лефков.
Тој потоа директно му се обрати на Фрчкоски и ја прошири политичката критика и кон луѓето околу лидерот на СДСМ, Венко Филипче.
„Јон, има суштинска разлика помеѓу мене и тебе. Јас за моите зборови и постапки стојам јавно и одговорно. И токму тоа очигледно ви пречи“, рече Лефков.
Во продолжение Лефков изнесе сериозни обвинувања за употреба на наркотични средства, без во изјавата да приложи докази за нив.
„Ти и оние малкумина кои застанавте околу Филипче се искршивте плукајќи и клеветејќи, мислејќи дека така ќе се вратите на власт и ќе продолжите да користите наркотици по канцеларии. Тоа нема да ви го дозволи народот, Јон, не јас“, изјави Лефков.
Лефков повторно се наврати на зборовите „Си пробал? Те сликале“, кои ги посочи и при најавата за кривичната пријава.
„Си пробал? Те сликале. Тоа не се мои зборови. Тоа се твои зборови. Затоа, Јон, да знаеш, вистинскиот предизвик се институциите“, рече Лефков.
Тој порача дека доколку надлежните институции утврдат постоење кривично дело и одговорни лица, треба да следува постапување според законот.
„Ако институциите утврдат дека има кривично дело и одговорни лица, ќе има одговорност пред закон“, рече Лефков.
„Од денес, за мене ова не е фејсбук-тема. Од денес, ова е тема за институциите“, порача тој.
.
Извор: plusinfo.mk
