Протести во Кочани и на патот Битола–Ресен: Гуми запалени, сообраќајот блокиран!
Попладнево се одржаа два протести во различни делови на земјава, предизвикувајќи нарушувања на јавниот ред и сообраќајот.
Во кочанската населба Трајаново Трло, граѓани изразија револт поради новиот закон за одземање возила управувани без возачка дозвола. На улицата „Цветан Димов“ беа запалени гуми, но по кратка и тензична интервенција, пожарникарите и полицијата го изгаснаа огнот и го прекинаа собирот. Надлежните институции најавија дека ќе постапат соодветно, бидејќи ваквиот начин на искажување револт претставува кривично дело и нарушување на јавниот ред и мир.
Истовремено, група граѓани попладнево го блокираа патниот правец Битола–Ресен, предизвикувајќи целосен прекин на сообраќајот во двата правци. Околу 300 лица во 16:30 часот го затворија патот А-3 кај местото познато како Ромска населба. Протестот се одвива со поставување и палење гуми на коловозот, како реакција на одземањето на три возила од страна на полицијата. Возачите се принудени да користат алтернативни патни правци додека трае блокадата.
Демонстрантите ја изразуваат незадоволството од измените во Законот за сообраќај, а на терен се присутни полициски екипи кои го регулираат сообраќајот и обезбедуваат безбедност на учесниците и останатите граѓани.
