Продолжува судењето за убиствата на Вања и Панче
Во Основниот кривичен суд во Скопје, денеска продолжи судскиот процес за двојното убиство на Вања Ѓорчевска и Панче Жежовски. На рочиштето, одбраната на обвинетиот Љупчо Палевски започна со изведување на докази во обид да ја поткрепи својата верзија на настаните.
На изминатото рочиште беа изведени материјални докази од одбраната на Ѓорчевски, а беше сослушан и сведок на предлог на одбраната на Палевски.
Дел од доказите кои во текот на процесот ги изведе Обвинителството беа сведочења на семејствата на Вања и Панче. Сослушани беа и службени лица, инспектори, познаници и соработници на обвинетиот Љупчо Палевски. Потоа, Обвинителството изведе повеќе материјални докази кои вклучуваа видео-снимки од „Безбеден град“, електронска комуникација на обвинетиот Палевски, предмети собрани од местото на настаните и извештаи од техничка обработка на возилото Рено Кангу.
Според обвинението, Љупчо Палевски, Боре Видевски, Велибор Манев, Влатко Кешишов и Александар Ѓорчевски, се обвинети дека заедно испланирале грабнување на 14-годишната Вања со цел да присилат член на нејзиното потесно семејство да даде парични средства за откуп. Грабнувањето на оштетениот Панче Жежовски во Велес, пак, според обвинението, било со намера да го присилат да им го даде сопственото возило „Цитроен“ за да го користат за грабнување на детето во Скопје.
Малолетната Вања и велешанецот Панче, кои беа пријавени за исчезнати на 27 и 24 ноември, беа пронајдени мртви во близина на Скопје и Велес на 3 декември 2023 година.
