ПРОДОЛЖУВА ПРИТИСОКОТ НА СДСМ ВРЗ ТВ АЛФА Партијата поднесе кривична пријава
СДСМ продолжува со притисок врз ТВ Алфа откако денеска генералниот секретар на партијата Александар Саша Димитријевиќ соопшти дека поднел кривична пријава против сопствениците на телевизијата.
Тој соопшти дека поднеле кривична пријава до Јавното обвинителство поради постоење сериозни сомнежи за организирана шема на перење пари, даночно затајување и фалсификување деловни книги.
Пријавата е поднесена против повеќе физички и правни лица, меѓу кои и Питер Шац, мнозински сопственик, како и управителите на „Таргет Медиа“ и на „Алфа Скоп“ ДОО.
Според наводите на СДСМ, од 2017 година наваму, преку меѓународна мрежа на трансакции биле префрлени околу 2,85 милиони евра од странство кон Македонија, кои потоа завршувале во Алфа ТВ. Овие средства наводно биле прикривани преку фиктивни договори за маркетинг и реклами со компании кои немаат реална економска активност на македонскиот пазар. Преку т.н. „shell“ компании се заобиколувале законите за транспарентност на медиумската сопственост и финансирање.
Според Димитријевиќ, Финансиската полиција веќе констатирала дека се работи за „сомнителни маркетиншки услуги“ со цел прикривање на потеклото на парите, а за ова веќе имало започната постапка.
.
