ПРОБЛЕМАТИЧНИОТ ФЕНИ ИМА НОВ ГАЗДА – Комерцијална банка го стекна комбинатот за 38 милиони евра и ќе го продава – КОЈ ЌЕ ПОНУДИ НАЈМНОГУ
Комерцијална банка сега е нов газда на поранешен ФЕНИ, а сегашен Еуроникел индустри. Банката објави дека го стекнала комбинатот за сума од близу 38 милиони евра.
„Комерцијална банка известува дека на 11.12.2023 година во постапка за присилна наплата на побарувања од должникот ЕУРОНИКЕЛ ИНДУСТРИ ДОО с.Возарци Кавадарци, Банката се стекна со сопственост врз недвижен и подвижен имот за вкупна цена од 37.897.993 евра“, објави банката преку Македонската берза.
Фактор за ова разговараше со извори од Комерцијална банка, од каде ни ја објаснија целата постапка.
Всушност, Комерцијална банка беше главен доверител на поранешен ФЕНИ, а сегашен Еуроникел индустри, комбинат за никел кој се соочуваше со големи проблеми во работењето, а беше принуден и да го стопира процесот на производство и да ја одржува само топла печката, што чинеше и големи трошоци за електрична енергија. Се доведе во прашање и исплатата на платите на вработените, кои имаа чести протести во последниов период.
На основа на побарувањата кои Комерцијална банка ги имаше кон ФЕНИ и врз основа на проценетата вредност на комбинатот, Комерцијална банка го покрена извршувањето и вчера го објави на лицитација имотот на ФЕНИ.
Бидејќи, како што велат нашите извори, никој не се јавил на лицитацијата, Комерцијална банка практично се стекна со овој комбинат, односно практично го презема во своја сопственост.
Од банката велат дека секако ќе го продаваат комбинатот, за кој, како што нагласуваат, има интерес од неколку субјекти, и од домашни и од странски компании.
Дел од нив веќе биле и во посета на комбинатот, со цел да видат каква е неговата состојба и дали би се исплатело да инвестираат во негово заживување.
Зошто тие не се јавија на лицитацијата, одговорот од извори од банката е дека има два фактори. Првиот е дека некои од нив доцна разбрале за намерите на банката да го огласи комбинатот на лицитација и немале доволно време за да ги „скенираат“ бројките, односно да си ги направат потребните математики за тоа дали ќе влезат во една ваква инвестиција, и втората прчина е што, како што објаснуваат нашите соговорници, сите се надеваат дека ќе се намали цената на наредната лицитацуија.
Но, извори од банката за Фактор објаснуваат дека тие не брзаат и немаат намера да ја намалат цената, бидејќи ницвната проценка е дека комбинатот чини толку и не треба дополнителнио да се намалува неговата продажна вредност.
„Како што знаеме, работењето на ФЕНИ зависи од коњуктурата на пазарот, односно цената на никелот на светските берзи. Сега коњуктурата можеби не е диобра, но тоа се циклуси, а кога била добра коњуктурата, ФЕНИ знаел да направи и профит и до 50 или 60 милиони евра“, велат изворите за Фактор од Коемрцијална банка.
Нашите извори од Комерцијална банка исто така не ја потврдуваат и не ја демантираат оваа информација,. додавајќи уште еднаш дека има интерес од неколку страни, дури и од оние што сега работат со ФЕНИ, а кому ќе го продаде комбинатот, банката ќе одчлучи врз основа на тоа кој ќе понуди најдобри услови.
За комбинатот ќе има и наредна лицитација, на која ќе може да се пријави секој што ќе смета дека тоа му е исплатливо, но пшобедник ќе биде оној што ќе понуди најдобри услови.
Нина Нинеска-Фиданоска
