ПРЕКУ ОГЛАС ЌЕ СЕ ПОПОЛНУВА НОВА ДИРЕКТОРСКА ПОЗИЦИЈА – Владата продолжува со потрагата по раководители
Владата преку нов
оглас бара директор на Државниот инспекторат за шумарство и ловство, и како и
досегашните огласи бара тој да е државјанин на Македонија, да нема забрана за
вршење дејност, да има високо образование, да има најмалку пет години работно
искуство, но и да има соодветен документ за солидно познавање на странки јазик.
Или поточно да има сертификат за положен испит за познавање на еден од четирите
јазици кои се користат во Европската унија – односно англиски француски,
германски и италијански.
Лицето кое ќе
биде поставено на оваа позиција ќе може да остане на истата во следните четири
години.
Заинтересираните
покрај општите услови треба да обезбедат и дополнителни, меѓу кои и планови за
развој на институцијата.
Сите кандидати
треба да достават соодветна документација, која опфаќа пријава по оглас, кратка
биографија, мотивациско писмо, план и програма за работа, уверение за
државјанство на Република Северна Македонија, како и доказ дека во моментот на
именувањето со правосилна судска пресуда не му е изречена казна или прекршочна
санкција забрана за вршење на професија, дејност или должност. Секако меѓу
документите се бара и диплома или уверение за стекнати најмалку 240 кредити
според ЕКТС или завршен VII/1 степен образование, како и доказ дека има минимум
пет години работно искуство и сертификат за положен испит за познавање на еден
од четирите најчесто користени јазици на Европската Унија издадени од установа
или институција во државата или од странство, регистрирана како давател на оваа
услуга не постари од пет години.
Сите кои сакаат да бидат дел од оваа
институција имаат рок до 4 јули да се пријават и да ги испратат потребните
документи. Ако документацијата не е целосна, пријавите воопшто нема да бидат
разгледувани.
Владата не ја
открива платата на идниот директор, а огласот со деталите за пријавување е
објавен и на веб страната на Владата.
Инаку Државниот
инспекторат за шумарство и ловство врши инспекциски
надзор на шуми и шумско земјиште во државна и приватна сопственост. Сепак, на нивната веб страна скоро и да
нема информации за нивните активности во изминатиот период. Не се проследуваат
информации во делот за вести, за новости, последен годишен извештај е за 2023
година, нема тековни информации за активностите на оваа институција.
Последен
полугодишен извештај е за првата половина од 2024 година, каде може да се види
дека има 14 вработени, и тоа во инспекторатот за шумство има еден главен
инспектор, еден виш инспектор и единаесет советници-инспектори од областа на
шумарството. Додека инспекциските надзори од областа на ловството во првото
полугодие од 2024 година се извршени од: еден главен
инспектор еден советник-инспектор од областа на ловството.
П.О.
/faktor.mk
