Повеќе од 30 жртви во пожарот во Ханој

Бројот на загинати во пожарот во станбена зграда во главниот град на Виетнам, Ханој, се искачи на повеќе од 30, јавија локалните медиуми, повикувајќи се на градската полиција.

Виетнамските власти допрва треба да издадат соопштение со кое се потврдува последниот биланс на загинати.

Медиумите претходно јавија дека се верува оти пожарот избувнал доцна во вторникот, а 54 од 70-те луѓе кои биле спасени од зградата се хоспитализирани поради повреди.

Локалните власти соопштија дека околу 150 луѓе живееле во 10-катницата во областа Тан Ксуан. Не е јасно колкумина од нив биле во своите домови во моментот на пожарот.

Пожарот, кој најверојатно избувнал на првиот кат од зградата од сè уште неразјаснети причини, е изгаснат, а спасувачките тимови продолжуваат да ги пребаруваат урнатините.