Поради одрон затворена обиколницата во Битола
Поради свлечиште, од вчера од 18:30 часот затворена е обиколницата околу Битола, а сообраќајот се пренасочува низ градското подрачје. Информацијата ја соопшти Авто-мото сојуз на Македонија (АМСМ), од каде информираат дека екипи на Ј.П Македонија Пат се на терен и работат на расчистување на свлечиштето и нормализирање на сообраќајот.
Според АМСМ, сообраќајот на останатите државни патишта се одвива непречено и по суви коловози. Интензитетот на сообраќај на патните правци надвор од градските средини е умерен, а на граничните премини, од македонска страна, не се бележат подолги задржувања за влез и излез од државата.
Од АМСМ апелираат до возачите да ја прилагодат брзината на движење, да ја почитуваат поставената сообраќајна сигнализација и да управуваат внимателно со возилата, особено на делниците каде постои ризик од одрони.
Како потенцијално ризични се посочуваат патните правци Катланово – Велес, Маврово – Дебар – Струга, Виница – Берово и Кочани – Делчево, каде поради конфигурацијата на теренот постои можност од појава на свлечишта и одрони.
