Подготовки за Водици во Охрид – најмасовниот верски настан во земјава
Охрид и оваа година ќе биде домаќин на најмасовната верско-културна манифестација во земјата, Богојавление – Водици, која се одбележува со голема почит кон верските традиции и граѓанските обичаи.
Централните настани се предвидени за 19 јануари, започнувајќи од раните утрински часови со свети и празнични литургии во сите парохиски цркви. По нив, трите литии од црквите Св. Богородица – Каменско, Св. Георги – Горна Влашка Мала и Св. Никола – Геракомија ќе се упатат кон градското пристаниште.
Чинот на полагањето на Светиот крст во водите на Охридското Езеро ќе се изврши во 10 часот од Колцето на пристаниште, а ќе го изведе Митрополитот Дебарско – кичевски, г. Георги.
Во 12 часот на плоштадот „Св. Климент Охридски“ ќе се одржи концерт на фолк дивите Елена Андоноска и Елена Велевска, а за присутните верници и добронамерници ќе се служи и топла ракија. Истиот ден, од 9 до 15 часот, Црвен Крст – Охрид ќе ја спроведе традиционалната крводарителска акција „Една капка може да промени се“ во ЦК „Григор Прличев“. Екипи на Црвен Крст ќе бидат задолжени и за безбедноста на капачите.
Во месноста Сараиште, точно напладне, ќе се изврши и бесплатно групно крштевање, според црковната традиција.
Се очекува на манифестацијата да присуствуваат туристи од земјава и соседните држави, а градот ќе биде во празнична и верска атмосфера.
