Печалбарите на протести: Мицкоски, Петрова и Димитриевски да дојдат да ги слушнат нашите барања!
Поранешните вработени во американските бази во Ирак и Авганистан од денеска го започнаа својот секојдневен протест пред просториите на Управата за јавни приходи во Куманово. Незадоволството кај граѓаните е предизвикано од решенијата за ретроактивно оданочување на нивните приходи од 2020 година, поради што јавно ги повикаа премиерот Христијан Мицкоски, директорката на УЈП Елена Петрова и градоначалникот Максим Димитриевски на итна средба.
Главниот проблем за илјадници кумановци е одбивањето на УЈП да ги прифати доставените докази за нивната работа и престој во странство. Иако работниците располагаат со потврди од компаниите дека таму веќе бил платен данок од 15 проценти, македонските власти бараат официјални документи од ирачките и авганистанските институции. Печалбарите посочуваат дека такви документи е невозможно лично да се извадат и бараат државата по службен пат, преку амбасадите и МНР, да ги обезбеди потребните податоци.
Учесниците на протестот потсетуваат на неофицијалната средба со премиерот и директорката на УЈП, на која им било ветено дека ќе се формираат посебни тимови за решавање на овој проблем и дека рокот за плаќање ќе биде пролонгиран до 31 мај. Сепак, според нивните изјави, овие ветувања досега не се реализирани, а роковите за извршување истекуваат на 15 јануари, по што следуваат високи камати и присилна наплата.
Барањата на граѓаните се јасни: Управата за јавни приходи да го земе предвид фактичкиот престој надвор од државата подолг од 183 дена и како валидни докази да ги прифати пасошите, печатите и потврдите од работодавачите. Тие нагласуваат дека не се против плаќањето данок, туку бараат правична постапка и ревизија на донесените решенија.
Протестите ќе продолжат секој ден до 16 јануари во терминот од 14 до 16 часот. Се проценува дека во изминатите две децении во воените бази во Ирак и Авганистан работеле меѓу 10 и 15 илјади жители на Куманово, а само во последниот период околу 4.000 лица добиле известувања за даночни долгови кои во одредени случаи достигнуваат и по неколку илјади евра.
