Пакистан вети одмазда по индискиот ракетен напад: „Индија ќе ја плати цената“
По ракетниот напад на индиските сили врз пакистанската покраина Пенџаб и делови од Кашмир под пакистанска контрола, премиерот на Пакистан, Шехбаз Шариф, остро реагираше со закана за одмазда, велејќи дека Индија „ќе ја плати цената“ за својата постапка.
Во телевизиско обраќање на државната телевизија ПТВ, Шариф порача дека нацијата нема да остане немоќна пред, како што ја нарече, „очигледната грешка“ на соседната земја.
„Можеби мислеа дека ќе се повлечеме, но заборавија дека ова е нација на храбри луѓе“, рече тој, додавајќи дека Пакистан ќе даде соодветен одговор.
Индискиот министер за одбрана изјави дека мета на нивниот напад биле девет локации со наводна „терористичка инфраструктура“ во Пакистан, потенцирајќи дека нема жртви меѓу цивилното население.
Како одговор, пакистанските власти информираа дека биле активирани кинески борбени авиони и оти Пекинг бил целосно запознаен со ситуацијата. Две беспилотни летала беа соборени над Лахор, изјави полициски службеник за Си-Ен-Ен, без да прецизира од каде доаѓаат дроновите.
Лахор, град со околу 13 милиони жители, се наоѓа на само 21 километар од индиската граница, што дополнително ја нагласува чувствителноста на регионот во услови на зголемена воена активност.
