Јовановиќ: Примирјето е само „излезна рампа“ за Трамп, цените на храната во Македонија допрва ќе дивеат
Економскиот експерт Бранимир Јовановиќ од Виенскиот институт во емисијата „Ноќно студио“ на 4ТВ истакна дека неодамнешното стивнување на тензиите на Блискиот Исток не значи крај на економските маки, туку само привремено стратешко повлекување.
Како што вели, македонската економија допрва ќе го почувствува вториот бран на инфлацијата, кој сега се префрла од енергенсите врз храната.
Јовановиќ анализира дека брзото примирје било очекувано за Виенскиот институт, бидејќи долга војна со Иран не му одговарала на американскиот претседател Доналд Трамп.
„Трамп сфати дека не може да го примени сценариото од Венецуела во Иран – не успеа да направи насилно менување на режимот. Виде дека со војната си прави повеќе штета себеси и на светската економија, особено откако Иран се закани со затворање на Ормускиот Теснец. На Трамп му требаше само ‘излезна рампа’ за да се претстави како победник и да се повлече“, вели Јовановиќ.
Според Јовановиќ, Иран од овој конфликт излегува посилен и со поголеми апетити. Светот покажа страв пред можноста Иран да го блокира Ормускиот Теснец, што е клучен за светската нафта.
Иако цената на нафтата падна од 110 на околу 95 долари по барел, Јовановиќ предупредува дека тоа не е доволно за да се смират цените во Македонија.
Првичниот шок кај енергенсите од март веќе почна да се „прелива“ во цените на другите производи. Официјалните податоци покажуваат дека инфлацијата почнува да ги јаде цените на храната во Македонија.
Јовановиќ предвидува дека нафтата нема да падне на нивото од 60-70 долари, туку ќе остане висока, околу 90-95 долари.
„Можеби најлошото помина во смисла на воени дејствија, но економските последици ќе се чувствуваат уште долго. Штетата е веќе направена, а неизвесноста што ќе се случи по овие две недели примирје дополнително ќе ја кочи економијата“, заклучува Јовановиќ.
