Ѓоко Поповски, осуден во „Триста“ и „Тенк“, излезе на слобода со делумно помилување од Силановска

Поранешниот помошник-министер за јавни набавки во МВР, Ѓоко Поповски, излегува на слобода по девет години, откако беше делумно помилуван од претседателката Гордана Силановска Давкова.

Во одлуката за помилување стои дека „делумно се ослободуваат од понатамошно извршување на неиздржан дел од казната затвор осудените, меѓу кои и Ѓоко Поповски“.

Поповски беше осуден во предметите „Триста“ и „Тенк“ на поранешното СЈО, поврзани со набавка на 300 возила за МВР и набавката на луксузниот „мерцедес“ од 600.000 евра кој сè уште е во сопственост на Службата за општи и заеднички работи при Владата.

Иако претходната влада предводена од СДСМ најави дека ќе го продаде возилото поради високите трошоци за одржување, тоа досега не е реализирано.