Официјално: Еврозоната влезе во рецесија

Економијата во еврозоната падна за 0,1 отсто во првиот квартал, објави денеска Евростат.

Последниот квартал од 2022 година, исто така, забележа пад на БДП од 0,1 отсто, така што по два последователни квартали негативен раст, еврозоната влезе во блага рецесија.

За разлика од еврозоната, економијата на ЕУ забележа благ квартален раст од 0,1 отсто.

Најголем економски раст во однос на претходниот квартал е забележан во Полска – од 3,8 отсто, Луксембург – 2,0 отсто и Португалија – 1,6 отсто, додека најголем економски пад е забележан во Ирска – за 4,6 отсто, Литванија – за 2,1 отсто и Холандија – за 0,7 отсто.

Германската економија падна за 0,3 отсто на квартално ниво, додека економски раст е забележан во Франција – 0,2 отсто и Италија – 0,6 отсто.

Потрошувачката на домаќинствата е намалена за 0,3 отсто на квартално ниво, како во еврозоната, така и на ниво на ЕУ. Државните трошоци се намалени за 1,6 отсто во еврозоната и за 0,9 отсто во ЕУ.

Кварталниот извоз падна за 0,1 отсто во еврозоната, а порасна за 0,1 отсто во ЕУ, додека увозот падна за 1,3 отсто – и во еврозоната и во ЕУ.