Одложено рочиштето за „Онкологија“ – следно судење на 1 јуни

Денешното рочиште во Основниот кривичен суд во Скопје за случајот „Онкологија“ е одложено, откако е утврдено дека техничкиот советник на Обвинителството не може да присуствува поради, како што е наведено, неодложни работни обврски.

Судот информира дека следното рочиште е закажано за 1 јуни.

Во овој предмет, поранешниот директор на Клиниката за онкологија, Нино Васев, заедно со онколозите Симонида Црвенкова и Драган Јакимовски од Клиниката за радиотерапија и онкологија – Скопје, се обвинети за несовесно лекување пациенти.

Претходно, постапка беше поведена и против онкологот Мери Пешевска, која призна вина и беше осудена на две години условна казна затвор.

Според обвинението, лекарите се товарат за продолжени тешки дела против здравјето на луѓето и несовесно лекување, при што кај 47 пациенти биле применувани несоодветни терапии, со отстапувања во дозирањето и без соодветна медицинска процена.

Случајот го води судијката Снежана Марковска, а обвинението го застапува јавната обвинителка Марија Ѓоргева од Основното јавно обвинителство – Скопје.