Одбраната на сопственикот на „Пулс“ бара укинување на притворот, родителите на жртвите реагираа со гнев
На почетокот на денешното рочиште за судскиот процес поврзан со кобниот пожар во објектот „Пулс“, одбраната на првообвинетиот сопственик, Дејан Јованов-Деко, повторно побара негово ослободување од ефективен притвор. Како главна причина за ова барање адвокатите ја наведоа влошената здравствена состојба на обвинетиот.
Адвокатката Ивана Коцевска апелираше до Судот и Обвинителството да покажат хуманост и да не подлегнуваат на притисоци од јавноста при одлучувањето. Таа достави и медицински извештај од преглед извршен претходниот ден.
Барањето за укинување на притворот предизвика вистински револт кај родителите на настраданите кои беа присутни во судницата. Тие со висок тон извикуваа „срамота“, а се слушнаа и заканувачки пораки упатени кон обвинетиот. Поради ваквите реакции, одбраната побара отстранување на јавноста, но судијката Диана Груевска-Илиевска се одлучи само за предупредување.
Обвинителот Борче Јанев експлицитно се изјасни дека Обвинителството не може да даде позитивно мислење за куќен притвор во овој момент. На забелешките на одбраната дека веќе поминале осум дена од првичното поднесување на барањето, обвинителството најави дека и писмено ќе се произнесе по предлогот.
Покрај Јованов, укинување на мерките побараа и правните застапници на другите обвинети во случајот:
Судскиот совет допрва треба да донесе конечни одлуки по однос на поднесените предлози за измена на мерките за обезбедување присуство.
