Николоски најави „Градски воз“ во Скопје од 1 септември и набавка на нови патнички возови
Решавањето на сообраќајниот хаос во главниот град и модернизацијата на железничкиот сообраќај низ државата влегуваат во клучна фаза. Вицепремиерот и министер за транспорт, Александар Николоски, во интервјуто за „Ноќно студио“ на 4TV.mk, ексклузивно најави дека проектот „Градски воз“ во Скопје ќе стане реалност веќе од почетокот на претстојната учебна година.
Според планот на Министерството, првата линија на градскиот воз ќе ги поврзува периферните населби со центарот на Скопје, користејќи ја постојната железничка инфраструктура.
Паралелно со овој проект, министерот најави дека државата веќе го истражува меѓународниот пазар за набавка на нови, модерни патнички возови. Станува збор за набавка на два типа возила кои ќе ги задоволат потребите за внатрешен и меѓународен сообраќај.
Николоски потврди дека веќе е потпишан договорот со ЕБРД за набавка на нови локомотиви, со што се става крај на долгогодишната состојба во која Македонски железници располагаа со едвај неколку функционални машини. Овие инвестиции, според него, се јасен доказ дека железницата повторно станува приоритет на државата.
