Николоски: Автопатот Кичево-Охрид е најевтин во државата, но лошото планирање нè чинеше време
Иако во јавноста често се перципира како „најскапиот проект во историјата“, автопатот Кичево-Охрид со цена од 13,5 милиони евра по километар е сè уште најевтиниот автопат што се гради во Македонија. Вицепремиерот и министер за транспорт, Александар Николоски, во интервјуто за „Ноќно студио“ на 4TV.mk, презентираше компаративни бројки за да ја разјасни вистината околу чинењето на инфраструктурните проекти.
Николоски појасни дека доколку проектот бил завршен на време, цената ќе била уште пониска, но инфлацијата и корона-кризата ги зголемиле трошоците.
Министерот нагласи дека клучната грешка во минатото не била само во финансиите, туку во катастрофално лошото планирање кое довело до децениско доцнење.
Со оваа анализа, Николоски порача дека Владата става крај на практиката на „проектирање во од“ и дека во иднина секој проект ќе започнува само по целосно завршена експропријација и јасна финансиска конструкција, со цел да се заштити буџетот на граѓаните.
