Насилни прослави во Париз по победата на ПСЖ: 294 уапсени, оштетени еврејски институции
Прославата на историската победа на фудбалскиот клуб Пари Сен Жермен (ПСЖ) над Интер во финалето на Лигата на шампионите во Минхен беше засенета од низа инциденти и насилства во Париз. Полицијата уапси 294 лица на неколку локации низ градот, вклучувајќи ги Шанзелизе, париската обиколница и квартот Порт де Сен-Клу, објави BFM.
Според париската полиција, многу од уапсените поседувале пиротехнички средства и запаливи материјали. На одредени места дошло до судири со полицијата, која употреби водени топови и солзавец. На плоштадот Етоал демонстранти ја пробиле полициската бариера, на Шанзелизе бил запален автомобил, а ограбена е и продавница за чевли.
Министерот за внатрешни работи Бруно Ретахо го осуди насилството:
– Вистинските навивачи слават, додека варварите го уништуваат градот и ја провоцираат полицијата – напиша тој на X.
И покрај инцидентите, дел од прославите низ градот имале празнична атмосфера. Ајфеловата кула беше осветлена во боите на клубот, а илјадници навивачи учествуваа во чествувањата. Вкупно 5.400 припадници на полицијата и жандармеријата беа мобилизирани за одржување на редот, потврди шефот на полицијата Лоран Нуњез. Фудбалерот Усман Дембеле упати апел:
– Славиме, но без насилство.
Дополнителна загриженост предизвика вандализам врз еврејски институции во Париз. Израелскиот претседател Исак Херцог изрази згрозеност од нападот врз синагогата во населбата Маре, изградена од неговиот прадедо, рабинот Џоел Херцог.
– Ги повикувам француските власти да дејствуваат брзо и решително за да ги изведат сторителите пред лицето на правдата, рече Херцог, пренесувајќи солидарност до Советот на еврејски институции во Франција (CRIF).
Француската полиција потврди дека пет еврејски институции биле испрскани со зелена боја. За случајот е покрената истрага.
